来源：微信公众号 广州正嘢
我哋对于广州土生土长嘅人都会称呼为”老广州“，但係，哩个世界上仲有另一个老广州。
- 而哩个老广州就埋藏係我哋脚下面。
广州十八老城门
唔讲唔知，旧时嘅广州城足足有十八个城门分别係：-南城：小东门、永兴门、永清门、五仙门、靖海门、油栏门、竹栏门、太平门；-内城：东门、小南门、文明门、正南门、归德门、西门、大北门、小北门；-鸡翼城：东便门、西便门。
- 大部分嘅城门都係通过方位嚟命名，而哩啲城门都可以反映係我哋现时所用嘅地名上。
- 比如东边有个“大东门”，南边有条“大南路”，西边有个“西门口”，北面有条“小北路”。
- 熟路嘅朋友通过东南西北哩四个门都大致可以知道以前旧城有几细。
有冇依家广州一个区大都唔知。
当然啦，所有嘅城门，包括整个旧广州城都已经係我哋脚下，就算你知道佢就係下面，都冇办法见到了。
除了，西门口
当初1999年遗迹被发掘后对公众开放，对于从细到大就係生活係西门口嘅人嚟讲，绝对係一件大事。虽然我当时只得几岁，但係都知道屋企门口有个好巴闭嘅文物。
- 而且，全广州只有西门口有。
仲记得嗰阵时，个个都争住去睇，一条细细嘅桥逼满晒八卦又好奇嘅街坊，其实就一个好似废墟咁嘅城墙，但係个个都兴奋到好似见到大明星係入面咁。
- “嗱，以前广州就係哩度下面啦。”- “啲墙啊砖啊，古代用嘅居然同依家嘅差唔多嚄！”
嗰阵太细，仲谂唔明，点解以前嘅人要住係地底啊？
- 可能係出于自豪感，当你自己屋企有广州独一无二嘅古迹，相信你都会以此为荣。毕竟，平日安安静静嘅西门口，难得有一件称得上“轰动”嘅“大单嘢”。
- 几百年前，西门係最旺最多人嘅城门，同好多古装片一样，总係有一个大市集係城门隔离，而西门就係一个咁嘅存在。西门外一条大直路通去西关、泮塘郊区。
- 无论係打仗走难，定係着草走佬，西门口都係一个最佳选择。
散落各处的零丁
- 虽然话就话古迹全部都深藏地底，不过城门存在咗咁耐，点都有些小沧海遗珠有迹可寻嘅。
东
- “大东门，中山三路站到了。”
去过中华广场、流行前线蒲嘅各位，大部分人都係哩个站搭过车。听个名都知道，正东城门就係哩度！
车站行落小小有条东濠涌，以前个个都知佢係一条出名嘅臭河涌，后来整治过，依家仲多条绿道。
不过护栏有四个“大东门桥”嘅字你又有冇留意过？
你知道东濠涌好臭， 但係你唔知佢点解咁臭？
你米睇东濠涌就得细细条，以前佢係一条大名鼎鼎嘅护城河。
- “入去难，出去更难。”
当年清兵攻城大屠杀，造就咗一场大逃难。好多唔想死嘅平民希望从东门出去，但係因为桥面太窄，人数太多，人逼人，结果就好多人逼到跌落河，命丧东濠涌。
无数尸体係东濠涌慢慢腐烂、发臭，结果就臭到依家。（好吧哩句係吹嘅，但大屠杀係真嘅。）
南
文明路上，市一宫对面有一条巷仔，有个古色古香嘅小牌坊写住“文明门”。好多人以为哩条巷叫文明门巷，但係住哩头嘅老街坊话：“唔係巷，佢就叫文明门！”
- 文明门係属于南边嘅一道小门，对面嘅市一宫係旧时嘅孔子庙（即广府学宫）。
- 相传每个係孔子庙考试出嚟嘅书生都会经过文明门，再行入青云直街，咁就可以“青云直上”，攞个好意头。
- 计我话斋，哩度肯定就係广州嘅“文昌位”！有利于学术研究，所以文化气氛特别浓厚。唔信你睇下，文德路成条街都卖字画，文德路小学嘅学位个个都争穿头。
大南门
北京路同大南路嘅交界，永远都係等朋友、等司机嘅好地方。
- “我係潮楼哩边啊，你行过嚟啦”- “对对对，就在永汉戏院那个路口”
哩条阔到要整个安全岛係中间嘅T字路口，就係正南门上盖。
点解每道门上盖， 条马路都超阔？
我之所以会有咁嘅疑问，就係因为解放路同大德路交界，哩个车水马龙嘅超大十字路口。
- 而佢嘅下方，係一道叫归德嘅门。
归德门
归德门可以话广州最巴闭嘅一道门。旧时嘅城门都会有门禁，时辰一到就会关闭，但係如果有特别情况会开门通行。 当然， 除了归德门。- 唔理你係皇帝出巡，定係官员急务，就算係救火救人，如果想经过，都只可以兜其他城门入，- 反正，归德门打死都唔开。
古时出入最严禁嘅门，偏偏依家就成为出入境大楼。
出入通行，全部要经过佢“十五个工作日”嘅审批，每日准时开工收工，过时提交签证申请就只可以明天请早。
- 无论你点催、俾钱加急都依然要一等再等。- 古代流传落嚟嘅传统规矩到依家都要遵守。
北
- 一讲到北，必然就係“小北”。
係越秀公园嘅东门，有一个复刻版嘅小北门。
虽然佢个名叫小北门，不过一啲都唔惹小。当年清兵攻城就从小北门开始进攻，结果因为小北门太过坚固，足足打咗十个月都打唔入，最后只可以弃攻。
除咗门口嘅重造城门之外，越秀公园入面仲有一段真真正正嘅明代古城墙。
唔係复刻，唔係模仿，货真价实嘅百年古墙。
公园嘅一棵大老树盘根缠绕住城墙，园内嘅公公婆婆悠闲係墙边休息、打牙铰。
- 百年以前，佢抵挡住清军嘅猛攻，成为广州街坊嘅保护神。- 而今时今日，虽然和平世代没有战火，但佢依然默默係度为我哋遮风挡雨，横跨几个世纪守护住我哋嘅嬉笑怒骂。
除此之外，北京路步行街上发掘出嘅一段古城路面遗迹，经已成为每个游客必到嘅打卡地点。而路口嘅黑色石碑上更加有古代广州城嘅模型。
- 旧时嘅每一道城门，每一条街，都被清清楚楚真实还原，穿过哩一版模型，你就可以见到百年前嘅广州城。
- 有啲嘢，身为广州人嘅你，好需要知道。
END
今期热点
香港 · 小众 · 新景点￥99佛跳墙，￥9.9鱼翅捞饭，食到扶墙走！广州 · 游戏机室承载好多广州人的梦想 · 527路公交车一道"酸汤鱼"风靡大广州，感受贵州美食风情！曾经荣耀的广州老行当，即将消失的“线面”
若只能选广州一家店，我一定会带你去...我哋请人啦！月薪4000起再+绩效，搵工跳槽嘅你留意啦！
|
240816
